Weihnachtsgeschichte uff Paelzisch

Es war ämol de Kaiser Auguschd in Rom und der war meischd so korz vor Woihnachte Pleite, do hodd er die Idee gehabt, mer zählen unser Volk und do kenne mer wenn se schunn ämol do sinn, die gleich mol ä bissel erleichtere unn äh paar Steure oitreibe.

Also musste sein Schdadhalter de Cirius alle uffschreiwe die do kumme sin, wer wo wohnt, wer was schafft und was er so an barem oder sunschdwas hodd

De Herr Rodes war de Kännisch vun Judäa dort und der hodds kontrolliert unn sich nadierlich ach die Dasche vollgschdoppt.. Soweit so gudd, is jo nix neies, heit hässense halt Fiskus, Schäuble, Schbahn unn so weidder oder schmeissen de Zaschder uff die Schdross, wie be..scheurer..et kann mer soi.

Do gabs ähn Zimmermann, aus Nazared, lossen mer ihn mol Joseph hesse, so hiess dort jeder Dritte..kennt also hikumme. Dem soi Fraa, die Mary is irschendwann Schwanga worre, awwer er hodd gsacht, er wärs net gewese, weil er garnet in der Zeit do gewese war, sonnern uff der Walz? ..hmmm - "wer känntsen dann gewese soi? de heilische Geischd oder was?" Die Mary hod awwer beteuert: "Joseph, ich wässes net, ..do war son blonde Engel..! Worschd, ich will nix here, hodd de Joseph gsat, mer missen do zur Volkszählung hie und des Bobbele wenns dann kummt oitrache losse unn des misse mer in Betlehäm mache, do wu ich her bin. Die Mary hodd dann gsagt, dann geh mer doch glei, weil do driwwe hods geilere Gschäfte, so korz vor Woihnachte passt des dann, fer zum oikaafe.

Also sinnse losgezoge um de Opa David zu besuche, des war eischendlich de Scheff von dere Bande, awwer der war garnet dehäm. Oh Mary was mache mer den jetzt, es Hildon is ausgebucht unn ach die annere Pensione hän nix mer freighabt, alle sinn im Woihnachtsrausch. Es Royalpalace hädd noch die Hochzeidsswidd freighabt, awwer soviel Fett hatten se net uf de Kett, um des zu bezahle..

es iss dann ach schunn Owwend worre und wohie nu, wo kenne mer penne? Mary hodd ach schunn gehescheld, weil des Bobbele kumme wollt. Vunn de Ferne hodd do so ähn Esel gschrie unn weils schunn Arschkalt war, hännse mol in dem soin Schdall geguggt, do isses warm drin gehe mol noi, ...unn do isses dann ach schunn glei losgange mit dem Bobbelsche..bissel Stroh zammegekehrt und des Büwwel, ja er war männlich ..is dann ach glei kumme. Mary hodds dann Jesus genennt.

De Ochs, Esel unn die Kuh im Stall hawwen sich den Klä ahgeguggt unn sich newe drah gelegt, des war fer denn kuschlisch warm dann.

Drausse hawwen die Baure gschloffe bei ihre annere Viech, do isses pletzlich kurz so hell worre und ein Engel is erschiene. Der hod denne gsagt, das heit de Jesus gebore worre is und der würd alle Erlöse von ihre Sünde. Die Baure hänn erschd Angschd kriegd, awwer de Engel hoddse mit Engelszunge beruhische känne, die sollen doch mol do noigugge in de Schdall. Do sinnse dann ach noi gange und hänn glei a paar Windle gekaaft fer den Klänne. Dann sinn zu dem Engel noch en ganze Haufe annere Leid erschiene - un alle hawwen miteinander g'sunge: " Ehre sei Gott in der Höh - un Frieden den Menschen auf Erden, die guten Willens sind!"

Äh paar Stunne später sinn do noch so drei kumme und hawwen noch äh paar Sache debei ghabt fer de Jesus, ach was zu esse und die alle waren dann so richddisch satt. Die drei hänn gsacht, sie kummen vum Morscheland und do war ähn riessischer Stern am Himmel gewese, dem sin se hinnerher unn sin do jetzt beim Jesus geland.

Paar Dach später hännse zum Kännisch gemisst, weil die ganz Leud schunn gered hawwen, iwwer de Erlöser un de Kännisch war halt ach neigierisch. Alle hawwen se den Jesus agebete unn er der Kännisch war plötzlich nimmer de erschde Mann am Schdall..des hodden fuchsdeifelswild gmacht unn es muss jo was drah soi mit denne drei vum Morscheland und die Baure mit ehrem Engel. Des geht joh garnet, hodder sich gsat. De Jesus is immer bekannter worre und viel Leud sind kumme um ähn zu sehe.

Wie de Jesus dann schunn faschd zwe Johr war, hodd der Herr Rodes dann die Idee ghabt, alle zweejährische Umbringe zu losse, domit er sich sicher iss..weil die Konkurrenz muss weg. Die Leud hänn jo nur noch iwwer de Jesus gebabbelt unn nimmer iwwer ihn, außerdem wusste er nimmer wo de Jesus jetzt is, do hodd er die idee ghabt und gsat, lossich halt alle in dem Alter umbringe, do werd der schunn dabei soi. Awwer de Joseph und die Mary waren grad mim Jesus zum Tauche am Rote Meer, so hod er dann den Bu net erwischt.

De alte Herr Rodes is dann irgendwann gschdorbe und hodd owwe vum Erzengel Michel ähn aschdännische Tritt kriegt, do isser durchs schwarze Loch in die Galaxis unn war nimmi gsehe. Böse Zunge behaupten, er wär als Dark waidda wieder irschendwu uffgetaucht...awwer mer wesses net.

De Jesus awwer war bei de Angler und hodd noch ä paar gudde Sache gemacht...awwer des is äh annerie Gschicht.

(Der Grobe Leitfaden war von einem Pfälzer Musikant, das habe ich übernommen und etwas dazugedichtet... thommy müller @thommymueller.de )