Pfälzer Gedicht

- Auszug aus: - E Dutt voll Rosine...vom Bellheimer Heiner -

 

PÄLZER ZWIWWLE

Man muss doch danke immerfort
Daß in de Palz ach Zwiewle hott.
Zwiwwle Freund, des isch e Planz,
Die hott's in sich, ja, die kann's.
Die isch in ihr'm Allerei,
For de Körper, d'bescht Arznei.
Die dhuht die Läwensgeischter rege
Un de Körper richtig fege
Un mer braicht's käm Mensch veriwle,
Wann er ißt vun dene Zwiwwle,
Daß er richtig Luft mol kriegt.
Do sagt mer als e Zwiwwel riecht,
Jo, des isch ja grad die Sach,
en gute Käs, der riecht jo ach
Un isch for die Verdauung gut
Un e guti Zwiwwel reinigt's Blut.
Un so en gute Zwiwwelsalat,
zum Wellfläsch schmeckt der Delikat,
Der isch so kräftig in de Tat,
Der häßt in de Palz, "Dumbeetelsalat."
Un was isch des for e Delikatess,
Wann ich Zwiwwelkuche eß,
Mit ordentlich Rahm und Zwiwwle druff,
Do geht mer wie e Nedel uff,
Der jagt jo alle Grille fort,
Drum häßt er ach "Posaunetort."
Warum der grad den Name hott,
Ob des Lob isch oder Spott,
Eß mol, de Spott verstummt,
Du wäscht, wuher de Name kummt.
Du spürscht bei dem Gebrauch,
Hoscht du Zwiwwle in deim Bauch
Un die Sunn im Herze drin,
Die Tage dann viel schäner sin
Un singe kannscht du fröhlich als,
Es isch doch schäh in unsre Pfalz.